Internkontroll skal sørge for at vedtatte prosedyrar vert følgde og at pålagde og planlagde oppgåver vert gjennomførte. Solund kommune skal sikre at tenesten til barn og unge er forsvarlege og har god kvalitet. Kommunen har ei lovfesta plikt til å gjennomføre internkontroll. Det vil seie å kontrollere at arbeidet følgjer lover og reglar, og at det følgjer eigne vedtak, målsetjingar, rutinar og prosedyrar. Kvalitetssystemet er eit viktig verktøy for å gjennomføre internkontroll.
Kvalitetssystem
I Solund kommune skal alle tilsette som møter barn, unge og føresette jobbe etter BTI-modellen. Kvalitetssystemet er eit viktig verktøy i dette arbeidet, for i kvalitetssystemet ligg alle rutinar og prosedyrar for tilsette i kommunen. Det må vere samsvar mellom BTI-modellen og rutinar, prosedyrar og praksis. I kvalitetssystemet skal også alle avvik meldast. Solund kommune ønskjer at tilsette melder avvik. Dette er viktig for at vi skal kunne bli betre i arbeidet vårt. Gjennom kvalitetssystemet har også tilsette høve til å kome med framlegg til forbetringar.
Solund kommune brukar kvalitetssystemet Netpower Kvalitet
Tilsyn og forvaltningsrevisjon
Arbeidet med å sikre gode nok rutinar, prosedyrar og rett praksis skjer også gjennom tilsyn og forvaltningsrevisjonar.
Tilsyn betyr at ein instans innan offentleg forvaltning undersøker om kommunen overheld lov og regelverk, og at innbyggjarane får dei tenestene dei har krav på. Det er ofte Statsforvaltaren i Vestland som utfører tilsynet, men det kan også vere Arbeidstilsynet eller andre instansar. Statsforvaltaren har ansvaret for å samordne alle statlege tilsyn. Dersom instansen som gjennomfører tilsynet kjem fram til at kommunen ikkje følgjer lov eller regelverk, har kommunen plikt til å følgje opp og rette manglane.
Forvaltningsrevisjonar vert bestilte av kontrollutvalet og er heimla i kommunelova § 23-3. Ein forvaltningsrevisjon skal undersøkje om kommunen utfører oppgåvene sine i tråd med lov og regelverk og kommunale vedtak. I ein forvaltningsrevisjon kan ein til dømes vurdere om ressursbruken samsvarar med politiske vedtak og føresetnadar, om ressursbruken er effektiv og om regelverk vert følgt.